03 年後的七一遊行我都無參加過，唔知係咪早已改晒模式，今次七一真係睇唔慣。
我係由「３號場」出發，就係在新聞報導入面高叫「開路」o個一批。人群中好多人都將茅頭直指警察，認為警察玩o野，專登唔畀人行，等o的人頂唔順而下年唔來（當時烈日當空，陽光非常猛烈非常熱）。我唔知係唔係真，但主辦單位亦唔見得全無責任。
據我所見，每個「場」似係以半個足球場為單位，而且因為好熱，根本都唔係企得好密好滿，所以３號場o既人根本唔明點解話o左出發好耐，但３號場都仲未郁。但台上o既人就一味o係度載歌載舞，都無乜交代究竟係乜事。至少o黎講，遊行o既人好多都唔知唔係全面封路，而係要停低放車行，如果一早講，起碼都畀人知點解起步都要咁耐。
更甚o既係，等o左半粒鐘有多，到四點幾都仲o係度等o既時候，台上突然話等多三分鐘就行得。如是者過o左起碼三四個字都係未行到出維園，但台上就無再交代等緊乜，只係繼續載歌載舞。
我明白以年輕人唱民運歌、諷刺歌來吸引多o的年輕人參與的手法，但佢地亦要明白，在場內等出發o既人更需要的是資訊，o的人企o係場內又熱又焗，仲要畀佢地堆大喇叭狂炸，講真，不滿多過欣賞。
於是乎，等o左一個鐘頭之後，出到去之後o的人開始發爛，佔據o左電車線後，去到富豪對出路口就畀警察頂住，呢個時候警察就似乎要玩返o的人轉頭，唔知點解後來o既隊伍就一味沿原有o既路線行，行o左出電車路o個班就一路畀人困住直到變成「龍尾」。期間係唔見有任何人提供資訊，講o下究竟等乜，更加無人嘗試去疏導人流，只係由得警察「扣留」一堆遊行人士超過半個鐘，直到變做龍尾先至行得。
或者我真係誤會o左，我以為七一上街係為爭普選，但似乎實際上七一遊行係無中央主題，純粹由得遊行人士自行表達訴求，所以唔見有人帶領去叫普選口號，反而就不停o係度叫「曾蔭權仆街」，去到阿牛o個檔仲堅，係咁狂嗌「曾蔭權仆街杏加橙」。老實講，無行七一咁多年，真係唔知到原來七一已經變o左唔講訴求，只講粗口的花生騷。記得好多時遊行都會有o的家長帶埋細路仔出來諗住身教，但玩到咁o既樣，真係唔知教乜好。
沿途係就係見到好多不同政黨、團體，但講的都不是訴求、理念，而係清一色在籌旗。
越行越唔知做乜的情況下，終於在修頓就閃o左。我諗相同心態o既都唔少人，所以未去到數人頭位就散o左o既人應該好多。